Gent se voríi savè del quarantòtt 
la rava e la fava del rebellòt
mí ve la doo vera e distesa
e per ona sola palanca de spesa.

​

Già da vari ann la todescaría
la pesava su nún la soa tirannía 
e la biasimava el governo piemontés
perchè l'aveva dàa la libertà ai sò paés.

​

La polizia e el governo di zucchett 
eren fusina de forca e de manètt 
i lombard fier come inn semper stàa 
e amant de la propria libertàa.

​

Non podend pú soffrí el sò ghètt indègn 
che n'aveva miss al coll i coo de lègn 
han pensàa a armass e uniss davvera 
per liberass per semper de sta galera:

​

Intes coi comitàa segretament
i sciori han pensàa a armà gent
e speciàven el dí de dimostrà
quel che i lombard inn capazz de fà.
Intant quel Vicerè impostorón
andand via l'aveva segnà i cà de trà a montón
e quíi là de Vienna eren vegnúu in sentór 
di noster idèj e per disarmàn e fan terror

​

han proclamàa prima la legg marzial 
e pœu el stat d'assedi ed alter mal
e dopo vedend che el bugnón l'era madúr 
e che.nun sérem fort in di noster múr

​

han dàa fœura on pataffión stampàa 
che ne dava de lí a tríi més la libertàa 
che se saría convocàa i deputazion 
insomma l'era on òss in bocca a nun minción.

​

Quel proclama l'è staa el segnal trement 
della solevazión - Merda sui voster dent 
o porchi de patàn arcizucchetta 
che promettíi mel per damm bacchetta.

Tal e qual criàven i Milanés e, allón, 
viva l'Italia, fœura gent d'ogni cantón.

​

Giò coccard di poggiou, fœura bandér 
sú barricad, ai quartiér, ai quartiér 
se vosa da per tutt- dal governatór 
vòsen i caporión - e dopo do ór

​

copàa la sentinella, disarmàa i todisch 
el palazz del governo l'eva sòtt al fisch 
e Donell stremíi smort storàa
l'eva firmaa on decret de libertàa.

​

Cioè stampa libera, guardia nazional, 
permèss d'associazión in forma legal 
in quel fratemp el Radesch maresciall 
credend semper che Milan el fuss el ciall

​

el se trovava al studi in cà Cagnæula
a ris'c de borlà denter in musircula 
difatti i Milanés corrend per quella via 
han trovàa ch'el rattón l'era già via.

​

Che bel colp el saria stàa mai quèll 
l'avessen fàa presonnée quel gross usèll,
la truppa intanta la s'era schierada
sui sbocch de questa e de quella contrada

​

denanz ai dazi e in gir sui bastión, 
gh'era cavalleria truppa e cannón. 
El mis masc el se faséva giamò bèll 
già gh'era taccàa i caserma e el Castèll

​

gent armåa de cópp e sass
intant che combatteva i noster al bass
e quand vegnéva la cavalleria 
l'era ona salva de cópp sulla gnuccaría.

​

Viva l'Italia e mort ai làder 
gh'era scritt de per tutt, e fioeu e pàder
combattéven insèmma col nomm de Pio 
ch'el benediva la patria, e le sà Dio

​

quanto mal han fàa sti brútt zuccœu 
alla povera Italia e ai sò fioeu. 
Ma già on dí l'è passàa e i strappazúcch
træeuven che i Milanés inn pussée gnúcch

​

"Tartaifel, tartaifel, priganta italiana"
bestèmma tutta la razza patana 
e i noster, déghela o brutti crovàtt 
che sú i noster barricad gh'è sú 'l gatt

​

e mettéven su on gatt davvera 
per mincionà i zucchèj in sta manera. 
Pin pon spara el cannón de chí e de lí 
e i noster ciappa quest che l'è per tí

​

èren s'cioppettad che piccàven via 
che decimava squas tutt l'artiglieria, 
de modo che Milan l'è stàa on cimitér 
per i crovàtt e i cannoniér.

​

L'ha cercàa Radeschi de vegní a patt 
ma giusta, crèpa tí e i tò crovàtt, 
al Geni el Sottocorno della scanscia 
el se striscia perfinna con la panscia

​

quacc quacc adrée al múr finna alla porta 
e l'ha vongiuda d'acqua rasa e robba forta 
e pœu dàgh el fœugh e scappa via
mandand a fœugh e fiamm la gnibaría.

​

E væuna-alla caserma i polizai
in stàa ciappàa in la ret compagn di quaj 
e Santa Margherita similment
l'è stada desmorbada bravament.

​

Anzi è stàa fàa on falò cont i procèss
che quèll car Torresani l'avea tràa apprèss 
s'è derví i cadenazz ai presonée
e fœura tucc i can del sò pajée.

​

A Porta Cina alla Passión e alter sit 
se batteva i todisch polit polit, 
insomma nell'interno tant e tant 
se guadagnava terrén e ben d'incant. 

​

Ma ai dazi, ficuj car, gh'era i boffètt 
che faséva paura ai noster donnètt
e che impediven d'avègh la communicazión 
per la pacciatoria e la munizión.

​

Eppúr chí a Porta Tosa on ingegnée
l'ha trovàa el mèzz de cojonà i badée 
fasend colla lègna di gross fassinón
de fà borlà a brasc contra i cannón

 

e adrée de quist s'cioppettad de lira 
e avanti giovinotti ch'el cannón 
el tira. Viva l'Italia e i sò bersagliér
e giò sti crovàtt e sti cannoniér.

​

Marsc marsc tran tran, sonna el tambór
i todesch van via e el destin con lór
mànden a fœugh e fiamm tutti cassinn
che se trouva a lór circonvicinn.

​

Ma da l'ora Porta Tosa a nostra gloria 
l'è stada ciamada Porta Vittoria, 
tolta questa, anca tutt el rimanent 
l'è vegnúu in noster poter quietament.

​

La guerra l'è durada cinq giornad 
ch'han formàa la gloria de sti contrad. 
Sacchegg, fough, stupro, inn stàa bravúr 
de chi crovàtt, boémm e pan dúr

​

e insèmma a lor commèss, ruffian, braghée, 
spíi, puttann col Bolza han fàa el giudée
tresent e passa di noster inn costàa, 
destin porch, cinq més de libertàa.

​

Ma chi avaría ditt ch'el quarantòtt 
el preludiava la rovina di zuccòtt? 
e appènna via lór a nostra spesa 
èmm celebràa sta gloria milanesa.